Gedurende die naweek van 21 tot 23 September 2012 word die kykNET Buite Ekspo weer by Mbizi Caravan Lodge aangebied. Die oord is geleë 8km buite Warmbad op die Thabazimbi pad. Die oord pas 100% in by die Buite Ekspo se tema en bestaan uit verskeie puik fasiliteite. Gaan kyk gerus by www.mbizi.co.za om meer daaroor te wete te kom.

Die Missie van die kykNET Buite Ekspo is om die buitelewe te bevorder en te simuleer in ‘n veilige plaasomgewing en om die gesinswaardes deur familie aktiwiteite in die buitelewe te inspireer.

Hierdie Buite Ekspo sal die 4de een van sy soort wees wat die lig sien en die 2de een wat by Mbizi Caravan Lodge aangebied sal word. Die eerste Burger Buite Ekspo was in die Wes Kaap aangebied by Kambati River Resort net buite Swellendam in Februarie 2011. Die sukses hiervan het die organiseerders genoop om die konsep na die noorde van die land toe te bring en in September 2011 word die kykNET Buite Ekspo by Mbizi Caravan Lodge met groot sukses aangebied. In Maart vanjaar was Die Burger kykNET Buite Ekspo weer op sy pos by Kambati River Resort in die Wes Kaap en nou is dit weer die beurt van Mbizi Caravan Lodge om die mense van die noorde te vermaak met Die kykNET Buite Ekspo!

Die beplanning is tans om Die Buite Ekspo in Namibie aan te bied gedurende Oktober 2013 en daar word geweldig uitgesien na hierdie nuwe uitdaging.